Ad Familiares 4.13.1
quaerenti…mentem: i.e. non modo certa res nulla sed ne genus quidem litterarum usitatum veniebat in mentem mihi quaerenti (i.e. in mentem meam, dum quaerebam ‘quid ad te pottissimum scriberem’)
Quaerenti mihi iam diu
quid ad te potissimum scriberem
non modo certa res nulla
sed ne genus quidem litterarum usitatum
veniebat in mentem.
nam enim partem et consuetudinem earum epistularum
quibus secundis rebus uti solebamus
tempus eripuerat,
perfeceratque fortuna
ne quid tale scribere possem aut omnino cogitare.
relinquebatur
triste quoddamet miserum
et his temporibus consentaneum genus litterarum.
id quoque deficiebat me,
in quo debebat esse
aut promissio auxili alicuius
aut consolatio doloris tui.
quid pollicerer non erat;
ipse enim
pari fortuna adfectus
aliorum opibus casus meos sustentabam,
saepiusque mihi veniebat in mentem queri
quod ita viverem quam gaudere quod viverem.
